Roberto Carlos skoraði fyrsta "Ólympíumarkið" á ferlinum

Roberto Carlos er einn af mörgum úr heimsmeistaraliði Brasilíumanna frá 2002 sem er kominn heim til Brasilíu til þess að klára sinn glæsilega feril. Roberto Carlos leikur með Ronaldo hjá Corinthians en Ronaldinho samdi nýverið við Flamengo.

Corinthians vann 2-0 sigur á Portuguesa í fyrsta leik sínum í Paulista-mótinu í gær og skoraði Roberto Carlos annað mark leiksins beint úr hornspyrnu. Brasilíumenn hafa þá skemmtilegu hefð að kalla mörk beint úr hornspyrnu Ólympíumörk.

„Þetta er fyrsta Ólympíumarkið mitt á ferlinum þannig að þetta tók sinn tíma," sagði hinn 37 ára gamli Roberto Carlos í léttum tón á blaðamannafundi eftir leikinn. Ronaldo fagnaðí honum hinsvegar eftir markið með því að kyssa hann á skallann.