Charlies syngja um sambandsslit Steinunnar

Alma, Klara og Steinunn í stúlknahljómsveitinni The Charlies birtu nýlega brot úr nýju lagi á Facebook-síðu sinni. Stúlkurnar syngja lagið, sem heitir Game Over, á lestarstöð í New York og fjallar það um ónafngreindan fyrrverandi kærasta Steinunnar.

Í laginu, sem er samið af Ölmu og strákunum í upptökuteyminu StopWaitGo, er fjallað á hispurslausan hátt um háttsemi fyrrverandi kærastans og hefst það á þeim orðum að hún trúi ekki að hann hafi verið besti vinur hennar. Þá hefst mikill reiðilestur um að hún hafi fengið nóg af hjalinu í honum og að hann hafi fengið hana til að hlæja og gráta, en framhjáhald og lygar hafi gert út af við sambandið.

Lagið fer svo á flug og textinn byrjar að fjalla um hvernig hún trúir ekki að hún hafi sóað tíma sínum í kærastann og loks biður hún hann vinsamlegast um að hætta að hringja í sig og elta sig á röndum vegna þess að sambandið er búið, endanlega.

Sem sagt, mikill girl power-sálmur frá stúlkunum í Charlies, sem búa nú í Los Angeles og vinna að breiðskífu sem verður gefin út af útgáfufyrirtækinu Hollywood Records.- afb