Hugmyndir að nýrri sögu sóttar úr fjölmiðlaheiminum

Ragnar Jónasson rithöfundur er byrjaður að leggja drög að sjálfstæðu framhaldi glæpasögunnar Snjóblindu. Snjóblinda kom út fyrir síðustu jól og í kiljuútgáfu fyrir skemmstu. Að þessu sinni ætlar höfundurinn meðal annars að nýta sér reynslu sína úr fjölmiðlaheiminum við skrifin, en Ragnar vann við fjölmiðla fyrir fáeinum árum. Fyrst á Aðalstöðinni og hjá dægurmálaútvarpi Rásar 2 og síðan sem fréttamaður á fréttastofu Sjónvarpsins.

„Við skrifin reynir maður alltaf að sækja í eigin reynsluheim að einhverju leyti. Í glæpasögunni sem ég er nú að vinna að, sem er sjálfstætt framhald Snjóblindu, geri ég ráð fyrir því að sjónvarpsfréttastofa komi töluvert við sögu, enda getur lífið á slíkum vinnustað verið ansi spennandi. Mér þykir líka gaman að fá tækifæri til að rifja upp þann tíma þegar ég vann hjá Sjónvarpinu, sem var mjög eftirminnilegur,“ segir Ragnar.

Snjóblinda gerðist nánast að öllu leyti í síldarbænum Siglufirði yfir hávetur og gerir Ragnar ráð fyrir að Siglufjörður verði líka miðpunkturinn i nýju sögunni. „Mér þykir bæði skemmtilegt að dvelja á Siglufirði og að skrifa um bæinn svo það kemur auðvitað ekki annað til greina en Siglufjörður leiki áfram stórt hlutverk,“ segir Ragnar.