Pabbi Mugisons bjargaði bassa Diktu

„Það er einhver draugur í þessum bassa. Bassabölvunin," segir Jón Þór Sigurðsson, best þekktur sem Nonni kjuði, trommuleikari hljómsveitarinnar Dikta.

Dikta hefur tvisvar á skömmum tíma lent í því að bassi Jóns Bjarna Péturssonar, bassaleikara hljómsveitarinnar, fylgir þeim ekki á áfangastað. Í fyrra skiptið kom hann ekki með flugi frá Þýskalandi til London og í það seinna var hljómsveitin komin til Seattle þegar það fréttist af bassanum í Orlando - í rúmlega 4.000 kílómetra í fjarlægð. Það var enginn annar en Guðmundur Kristjánsson, pabbi tónlistarmannsins Mugisons sem fann bassann á færibandi á flugvelli í Orlando.

„Við hittum pabba hans Mugison í Leifsstöð," rifjar Nonni upp. „Svo lendum við í Seattle og þá kemur enginn bassi. Við bíðum og bíðum og bassinn kemur ekki. Svo erum við komnir í gegnum tollinn og erum að bíða eftir að geta tilkynnt um týndan farangur þegar við fáum sms frá Mána [Péturssyni, umboðsmanni Diktu]. Þá hafði pabbi Mugisons komist í samband við hann."

Guðmundur kannaðist við merkingarnar á bassanum og lét strax vita. Bassinn var svo sendur til Texas þar sem Dikta kom fram nokkrum dögum síðar á tónlistarhátíðinni South by South West. „Hann bjargaði bassanum," segir Jón að lokum og veltir fyrir sér hvar bassinn endi næst. - afb