Sendir spilara á stærsta pókermót heims

„Þetta er það stærsta sem hefur verið gert í pókernum hérlendis og jafnvel þótt víðar væri leitað,“ segir pókerkóngurinn Davíð Rúnarsson, Dabbi Rú, á Gullöldinni í Grafarvogi.

Pókerklúbburinn í Gullöldinni hyggst senda sigurvegara Grant‘s-mótaraðarinnar, sem hófst síðasta föstudagskvöld, á mót í WSOP-mótaröðinni í póker, sem er stærsta og virtasta pókermótaröð heims. Þá munu sex spilarar eiga möguleika á að vinna sig inn á Evrópumótaröðina EMOP.

Dabbi segir að pakkinn sem sigurvegari Grant‘s mótaraðarinnar fái í sinn hlut kosti um eina og hálfa milljón. „Þeir sem við erum að senda út eru ekki að borga krónu heldur greiðir pókerklúbburinn á Gullöldinni allan kostnað,“ segir hann.

Ekki er langt síðan Davíð og félagar fóru að senda sigurvegara í mótaröðum sínum á mót erlendis. Tveir spilarar eru leiðinni til Portúgals að keppa í mars og þrír í viðbót fara þegar Burn-mótaröðinni lýkur. Dabbi segir mótshaldara í Danmörku, Möltu og Noregi hafa klórað sér í höfðinu yfir því hvernig hægt sé að halda svona stórar mótaraðir í jafn litlu landi. Hafa þeir sent honum fyrirspurnir um fyrirkomulag mótanna.

„Þeir vilja apa þetta eftir mér og setja upp samskonar mót í sínu landi,“ segir hann stoltur. - afb