Aðeins fjórir húmoristar í símaskránni en 45 ljónatemjarar

Íslendingar eiga hátt í fjörutíu geimfara, tíu kónga, eina barnastjörnu og einn apa ef marka má skráningar í Símaskránna.

Í símaskránni eru fjórir húmoristar en Hrafn Helgi Helgason er okkar eina barnastjarna.

Þótt ótrúlegt megi virðast eru einungis sjö kvennagull á landinu og okkar eini galdralæknir eru hann Ólafur Örn.

Anton Björgvinsson sameinar síðan tvo ólíka heima, en hann er skráður sem galdrakarl og rokkstjarna.

Hér búa átta hestahvíslarar, eða reyndar níu með Valdimari Sigurðssyni sem er líka draugabani.

Þrátt fyrir veðurfar búa 45 ljónatemjarar á Íslandi og einn ljónaþjálfari. Þó munurinn á þessum tveimur starfsgreinum sé reyndar óljós.

Og það er líklega frekar lítið að gera hjá honum Kristni Hjaltasyni drekafangara akkurat um þessar mundir.

Og margir héldu að Bjarni Tryggvason væri okkar eini geimfari. Nei, við eigum 39 geimfara takk fyrir. Hér búa líka 27 kúrekar. Og enginn þeirra er búsettur á Skagaströnd.

Á Íslandi eru bara fimmtán djammarar, og svo er einn sem sameinar þessa tvo flokka. Það er kúrekinn og djammarinn Sigurður Brynjar Benediktsson.

Eini api landsins er 26 ára gamall stærðfræðinemi, búsettur í Reykjavík.

Hér á landi eru tveir fuglar, þau Halldór og Sandra. Og Hafþór Atli er eina fuglahræðan. Sem betur fer eru þetta ekki nágrannar.

Og við íslendingar getum státað okkur af fjórum Pókémon-meistururm. Geri aðrir betur.

Og þið hélduð að Kristján tíundi hefði verið síðasti kóngur íslands. Og nei, hér eru tíu kóngar, en bara sex drottningar. Þær eru reyndar sjö því auðveldlega má telja hana Auði Ösp Magnúsdóttur í þeim hópi. Enda er hún skráð sem prinsessumamma.

Aðspurð hvort einhverjar reglur gildi um starfsheiti segir Guðrún María Guðmundsdótttir ritstjóri hjá Já:

„Já við höfum rýmkað regluna varðandi starfsheiti í gagnagrunn. Fyrir nokkrum árum var þér ekki hleypt inn nema með viðurkennd starfsheiti svo sem: lögmaður, prestur, verkamaður og svo framvegis. Við erum í dag mjög opin og stoppum afskaplega fáa. Þeir sem ekki sleppa í gegn eru þeir sem við teljum að með „starfsheiti" sínu særi blygðunarkennd annarra, tengist vændi, ofbeldi, eru niðurlægjandi í garð annara. Viðskiptavinir Já eru afskaplega duglegir að nýta sér þessa rýmkun á reglunum og fá margir hrós fyrir hugmyndaflug við val sitt á starfsheiti sínu."