Sigurjón laus úr haldi

Sigurjón Þ. Árnason, fyrrverandi bankastjóri Landsbankans, hefur verið látinn laus úr gæsluvarðhaldi. Skýrslustökum yfir honum er lokið og sá sérstakur saksóknari ekki ástæðu til að halda honum lengur í haldi, að sögn Sigurðar G. Guðjónssonar, verjanda Sigurjóns.

„Sigurjón er laus úr haldi og það er aðalmálið," segir Sigurður.

Sigurjón var úrskurður í 11 daga gæsluvarðhald hinn 14. janúar síðastliðinn vegna gruns um að bera ábyrgð á meintri markaðsmisnotkun Landsbankans og öðrum brotum sem varða auðgunarbrotakafla almennra hegningarlaga.

Auk Sigurjóns var Ívar Guðjónsson, fyrrverandi forstöðumaður eigin fjárfestinga Landsbankans, einnig úrskurðaður í gæsluvarðhald sem átti að renna út í dag en Ívari var sleppt úr haldi síðastliðið mánudagskvöld.