Ísland tapaði sínum fyrsta landsleik í futsal

Ísland tapaði fyrir Lettlandi, 5-4, í fyrsta landsleik sínum í futsal eða innanhússknattspyrnu. Leikið var í forkeppni EM en riðill Íslands fer fram á Ásvöllum í Hafnarfirði.

Lettar skoruðu fyrsta mark leiksins en Ísland komst yfir, 2-1, með mörkum þeirra Magnúsar Sverris Þorsteinssonar og Þórarins Inga Valdimarssonar. Lettland náði þó að jafna metin áður en flautað var til leikhlés.

Liðin skiptust á að skora eftir þetta en Lettar voru þó ávallt skrefinu á undan. Guðmundur Steinarsson jafnaði metin í 3-3 á 24. mínútu og Þórarinn Ingi skoraði sitt annað mark í leiknum á 30. mínútu er hann jafnaði metin í 4-4.

En Dmitrijs Jakolevs skoraði sigurmark Letta í leiknum á 35. mínútu og þar við sat.

Hvor hálfleikur var 20 mínútur en leiktíminn er stöðvaður þegar boltinn er ekki í leik. Leikurinn allur tók því alls um tvær klukkustundir í framkvæmd.

Fyrr í dag skildu Grikkir og Armenar jafnir, 2-2, í sama riðli. Ísland mætir Grikklandi á morgun klukkan 17.00, einnig á Ásvöllum.