Biskup lýsti djúpri sorg vegna mistaka

Um 150 manns tóku þátt í námskeiði á vegum þjóðkirkjunnar í Neskirkju í gær. Dr. Marie M. Fortune fræddi viðstadda um kynferðislegt ofbeldi í samhengi kirkju og trúfélaga og rétt viðbrögð við því.

Karl Sigurbjörnsson, biskup Íslands, hélt erindi og fór með bæn í byrjun námskeiðsins, þar sem hann lýsti djúpri sorg vegna mistaka sem voru gerð innan kirkjunnar við meðferð mála tengdum Ólafi Skúlasyni og sagðist biðja þess að allir lærðu af þeim.

Þá sagði Karl að þjóðkirkjan væri í lærdómsferli sem miðaði að því að setja skýrari reglur um meðferð kynferðisbrota, efla fræðslu og skapa meðvitund um afleiðingar þess og forvarnir gegn því. Árni Svanur Daníelsson, upplýsingafulltrúi Biskupsstofu, segir mikla ánægju ríkja innan kirkjunnar með að dr. Fortune sé komin hingað til lands að miðla reynslu sinni.

„Biskup fagnar þessari heimsókn og tekur þetta mjög alvarlega,“ segir Árni Svanur. „Hann mun hitta Fortune tvisvar í þessari viku og fara yfir málin, eins og hann sagði í morgun [í gær]. Hann er mjög þakklátur fyrir hennar framlag til vinnu þjóðkirkjunnar í þessum málum.“

Karl mun hitta Fortune í dag ásamt fagráði þjóðkirkjunnar um kynferðisbrot.

Guðrún Ebba Ólafsdóttir var meðal gesta námskeiðsins og stjórnandi þess var sr. Gunnar Rúnar Matthíasson, formaður fagráðs þjóðkirkjunnar. - sv