Sýknaður fyrir misheppnaða ránstilraun - dæmdur fyrir önnur rán

Rétt tæplega tvítugur karlmaður hefur verið dæmdur í tólf mánaða óskilorðsbundið fangelsi fyrir vopnuð rán, þjófnað, eignaspjöll og fíkniefnalagabrot.

Maðurinn er meðal annars dæmdur fyrir að hafa rænt verslun 10-11 í Grímsbæ í desember á síðasta ári vopnaður hnífi. Maðurinn hafði rúmar fimmtán þúsund krónur upp úr krafsinu auk sígarettupakka.

Þá var hann einnig dæmdur fyrir að hafa rænt söluturn í Hraunbergi vopnaður hnífi fyrr á þessu ári.

Að lokum var maðurinn ákærður fyrir tilraun til ráns í ágúst síðastliðnum þegar hann á að hafa farið inn í verslun 10-11 í Glæsibæ vopnaður klaufhamri.

Maðurinn fór þó tómhentur út þar sem enginn starfsmaður var sjáanlegur. Maðurinn er sýknaður af þessum ákærulið þar sem lét af sjálfsdáðum af þeim ásetningi að drýgja brotið áður en það er fullkomnað.

Maðurinn hefur verið í gæsluvarðhaldi frá 13. ágúst og dregst sá tími frá refsingunni.