Viðvörunarljós bilaði í vél Iceland Express

Flugvél Iceland Express sem fór frá Keflavíkurflugvelli laust eftir klukkan fimm í kvöld til Alicante varð að lenda í Manchester í Bretlandi vegna viðvörunarljóss í stjórnborði flugvélarinnar sem gaf til kynna að eldur gæti verið laus í einu farangursrými hennar. Flugvélin lenti í Manchester um klukkan átta að íslenskum tíma og reyndist bilunin vera í viðvörunarljósinu sjálfu og því var aldrei nein raunveruleg hætta á ferðum.

Samkvæmt upplýsingum frá Iceland Express eru flugvirkjar nú að klára að yfirfara flugvélina og er reiknað með að því verði lokið um klukkan hálfellefu að íslenskum tíma. Farþegar eru enn um borð og amar ekkert að þeim. Ef skoðun flugvirkja leiðir í ljós að flugvélin geti haldið áfram til Alicante, ætti hún að vera komin þangað um klukkan eitt að íslenskum tíma. Það þýðir að brottför farþega þaðan seinkar um tæpar þrjár klukkustundir og ætti flugvélin að vera komin til Keflavíkur um klukkan sjö í fyrramálið.