Gerir upp mistök í einkalífinu

„Athyglin var slæm á marga vegu en hún kom mér á kortið þannig að nú get ég einbeitt mér að þeirri tónlist sem mig langar til að gera,“ segir Júlí Heiðar.

Spóla tilbaka, nýtt lag söngvarans, verður sett í spilun á mánudag. Lagið skartar rapparanum Óskari Axel í gestahlutverki og er um að ræða þvottekta sykursætan poppsmell. Texti lagsins er hins vegar í dramatískari kantinum, hann er uppgjör Júlí Heiðars, hinnar átján ára gömlu poppstjörnu frá Þorlákshöfn, við fortíðina.

„Málið var að ég gerði alveg svakaleg mistök, ég fór á bakvið kærustuna mína. Og þegar maður gerir eitthvað sem maður sér jafnmikið eftir þá vill maður fá að spóla til baka. Lagið fjallar því ekki beint um hana, kærustuna mína, heldur um þá sem vilja fá að spóla til baka.“ Júlí bætir því við að hann og kærastan hafi gert upp sín mál, hreinsað andrúmsloftið og að þau hafi aldrei verið jafn hamingjusöm og í dag. „Hún er búin að taka mig í sátt.“

Júlí Heiðar var á allra vörum á síðasta ári þegar lagið Blautt dansgólf tröllreið útvarpsstöðvunum og unglingar kyrjuðu lagið við hvert tækifæri. Texti lagsins fór fyrir brjóstið á forráðamönnum ungra aðdáenda poppstjörnunnar og eins og Fréttablaðið greindi frá voru barnaverndaryfirvöld farin að fylgjast með því að allt færi sómasamlega fram á dansleikjum þar sem Júlí var meðal flytjenda. „Ég er búinn að þroskast mikið síðan þetta var. Það sem við gerðum þarna og mér fannst aldrei koma nægjanlega fram var að lagið átti að skapa mér nafn, þetta var grín. Ég samdi hvorki textann né lagið en núna sem ég allt sjálfur,“ segir Júlí og upplýsir að plata sé í burðarliðnum. „Við ætlum samt að gera þetta hægt og rólega og platan kemur ekki út fyrr en við erum komnir með nægilega gott efni.“

Tónlistarmaðurinn ungi hefur því jafnað sig á þeim mikla brotsjó sem yfir hann gekk og hann segist hlakka til að byrja feril sinn upp á nýtt. „Ég og Óskar Axel erum sannfærðir um að þetta verði okkar sumar. Það er kominn tími á að hvíla Friðrik Dór og Erp, nú er komið að mér og Óskari,“ segir Júlí, en þeir tveir verða í eldlínunni á Söngvakeppni framhaldsskólanna á Akureyri um næstu helgi þar sem lagið verður frumflutt.freyrgigja@frettabladid.is