Brestir í sambandinu

Leikararnir Sean Penn og Scarlett Johansson hafa verið að stinga saman nefjum um nokkurt skeið. Tímaritið The Enquirer heldur því fram að Penn sé þó orðinn svo stjórnsamur að Johansson þoli ekki lengur við.

Penn er sagður heimsækja Johansson á tökustað kvikmyndarinnar We Bought a Zoo daglega og fellur hegðun hans ekki í kramið hjá samstarfsfélögum Johansson. „Hann verður fúll út í hvern þann mann sem svo mikið sem horfir í áttina að Scarlett og heimtar að starfsfólkið sinni öllum hennar þörfum. Ef Scarlett er svöng þá sendir Penn einhvern á næsta veitingastað til að ná í mat handa henni. Ef honum finnst eitthvað að förðuninni fær hann sminkurnar til að laga það. Þetta er allt mjög einkennilegt,“ var haft eftir innanbúðarmanni.

Sambandið er ekki talið eiga eftir að verða langlíft enda er Johansson nýskilin við leikarann Ryan Reynolds. „Scarlett hélt að það yrði gaman að eyða stund með Sean eftir skilnaðinn en hún vill ekki eyða tíma með einhverjum sem hagar sér eins og faðir hennar.“