Enginn vill gefa út Morrissey

Þrátt fyrir að hafa verið að og notið vinsælda í tæp 30 ár á tónlistarmaðurinn Morrissey í vandræðum með að finna útgáfufyrirtæki sem vill gefa út nýju plötuna hans. Hann segir útgáfurnar spenntari fyrir nýjum hljómsveitum.

„Ég er ekki með útgáfusamning og gerði ráð fyrir því að ef plötuútgáfurnar vildu mig myndu þær sækja mig. Ég get ekki gert mikið í þessu," segir söngvarinn Morrissey í viðtali við vefmiðilinn Pitchfork.

Síðasta plata Morrissey, Years of Refusal, markaði endalok samstarfs hans við útgáfurnar Decca og Attack. Hann er tilbúinn með efni á nýja plötu, en ætlar ekki að taka hana upp fyrr en hann skrifar undir hjá nýju útgáfufyrirtæki. Hann virðist óttast að áhugi útgáfufyrirtækjanna sé ekki til staðar, þar sem honum hefur ekki verið boðinn samningur.

„Ég held að útgáfufyrirtæki vilji frekar lokka til sín nýjar hljómsveitir svo þau geti eignað sér uppgang þeirra," segir Morrissey, spurður hvað valdi vandræðum hans. „Flestir muna eftir plötunum sem komu listamönnunum á kortið. Þess vegna skrifa fjölmiðlar bara um mig í samhengi við sögu The Smiths. Það er hvergi minnst á þá staðreynd að ég hef komið þremur sólóplötum á toppinn og verið einn að í 25 ár. Furðulegt."

Morrissey og hljómsveit hans fluttu nýlega þrjú ný lög í útvarpsþætti á BBC. Lítið fór fyrir þættinum og spurður hvort honum hafi fundist spennandi að kynna ný lög án risavaxinnar kynningarherferðar segir hann að það hafi verið frábært. „Engin læti, bara ganga inn og spila tónlistina," segir hann. „Ég þrái samt það sem þú kallar „risavaxna kynningarherferð". Það gerist aldrei."

Morrissey er augljóslega bitur, eins og hann hefur reyndar verið síðustu þrjátíu ár. Hann er þó ánægður með nýju lögin og segir að þau séu öll mjög sterk. „Ég vil ekki flytja fleiri ný lög opinberlega því áður en maður veit af verður platan aðgengileg í ýmsum myndum fyrir utan tilbúna upptöku úr hljóðveri."

Morrissey kom fram á Glastonbury-tónlistarhátíðinni í júní. Hann hitaði upp fyrir U2, en mikil rigning var á meðan á tónleikunum stóð. „Í þannig aðstæðum getur maður ekki búist við miklu frá áhorfendum, ég held að þeir hafi líka komið til að sjá U2 — sem er skiljanlegt," segir Morrissey. „U2 er með risavaxna Star Wars-sviðsmynd og trommukjuða sem lýsa upp Norður-Afríku. Ég get ekki keppt við það. Það eina sem ég get boðið heiminum er lögin mín."

atlifannar@frettabladid.is