Uppbygging í Garði: Nýtt íslenskt barnamauk

Þrjú ný störf hafa orðið til í Garði á Suðurnesjum vegna tilkomu fyrirtækisins Barnavagninn, sem framleiðir grænmetis- og ávaxtamauk fyrir ungbörn. Barnavagninn er rekið af sömu aðilum og eiga Ávaxtabílinn. Auk þess er Eignarhaldsfélag Suðurnesja hluthafi í fyrirtækinu og lagði því til stofnfé. Öll framleiðsla fer fram í Garði á Suðurnesjum.

„Þetta svæði hefur orðið heldur illa úti þegar kemur að atvinnuleysi og okkur finnst því jákvætt að hafa getað sett framleiðsluna upp þarna," segir Haukur Magnússon framkvæmdastjóri. Haukur og fjölskylda hans eru eigendur fyrirtækisins, auk Eignarhaldsfélags Suðurnesja en þátttaka eignarhaldsfélagsins er liður í atvinnuuppbyggingu á Suðurnesjum.

Auk þeirra starfa sem urðu til við framleiðsluna var leitað var til iðnaðarmanna á svæðinu við uppbygginguna. Í Garðinum búa um 1500 manns.

Barnavagninn framleiðir sex tegundir af mauki fyrir börn úr grænmeti og ávöxtum. Grænmetið kemur frá íslenskum garðyrkjubændum en ávextirnir innfluttir.

Um er að ræða mauk úr gulrótum, rófum, eplum, sveskjum auk tveggja tegunda af blönduðu mauki.

Haukur segir hugmyndina að barnamaukinu hafa lengi legið í loftinu enda hafa eigendurnir lengi einbeitt sér að hollustuvörum með starfsemi Ávaxtabílsins. Hann segir mikla þróunarvinnu liggja að baki og áhersla lögð á að næringargildið haldi sér sem allra best.

Engin óæskileg aukaefni eru í maukinu en eplasýru hefur verið bætt í nokkrar tegundirnar til að stilla sýrustig vörunnar. Þess utan er um hreint mauk að ræða. Þetta er í fyrsta skipti sem ferskt og ófrosið mauk fyrir börn er sett á markað hér á landi.

Haukur segist hafa tekið eftir aukinni áherslu foreldra á að gefa ungbörnum ferskt mauk. Þeir sem hingað til hafa gefið börnunum niðursoðið mauk frá erlendum aðilum hafi nú íslenskan valkost. Auk þess sem þeir foreldrar sem mauka sjálfir barnamatinn geta fengið kærkomið frí frá þeirri eldamennsku.

Vörur Barnavagnsins fást í verslunum Hagkaups, Bónuss, Krónunnar og Nóatúns.

Facebook-síðu Barnavagnsins má finna hér.

Mikil gróska virðist vera í þessum geira því í kring um áramótin setti fyrirtækið Kátir kroppar grænmetismauk fyrir börn á markað, og var það í fyrsta sinn sem íslenskir neytendur gátu keypt slíka vöru. Kátir kroppar framleiða fjórar tegundir af mauki sem er selt frosið í Fjarðarkaupum, Melabúðinni, Fjallkonubakaríinu og á Hamborgarafabrikkunni.