Erill hjá lögreglu: Ellefu í fangageymslur og tennur brotnuðu

Talsverður erill var hjá lögreglunni á höfuðborgarsvæðinu í nótt en margmenni var í miðbænum og mikil ölvun.

Ellefu gistu fangageymslur og var einn tekinn fyrir ölvunarakstur.

Þá komu þrjár minniháttar líkamsárásir til kasta lögreglu, þar af var maður sleginn í andlitið á skemmtistað með þeim afleiðingum að tennur hans brotnuðu.

Árásarmaðurinn er óþekktur og er málið í rannsókn. Nóttin var tiltölulega róleg hjá slökkviliði höfuðborgarsvæðisins en dælubíll liðsins fór í útkall vegna mikils vatnsleka í heimahúsi. Tjón af völdum lekans er talið óverulegt.