Aurora styrkir sviðslistir um 10 milljónir

Velgerðarsjóðurinn Aurora, sem stofnsettur var árið 2007 af hjónunum Ólafi Ólafssyni fyrrum stjórnarformanni Samskipa og Ingibjörgu Kristjánsdóttur, hyggst úthluta 10 milljónum kr. til sviðlistaverkefna á Íslandi.

Úthlutunarnefndina skipa Viðar Eggertsson, Ingibjörg Þórisdóttir og Auður Einarsdóttir. Opið er fyrir umsóknir á vef sjóðsins.

Einnig var í dag tilkynnt um 3 milljóna kr. styrk Auroru-sjóðsins til rústabjörgunarsveitarinar Ársæls og sömu upphæðar sem rennur til Listasafns Íslands vegna fyrirhugaðrar sýningar safnsins á verkum Louise Bourgeois.

Þá styrkti sjóðurinn Unicef um 40 milljónir vegna menntaverkefnis í Síerraleóne, Kraum tónlistarsjóðinn um 20 milljónir og hönnunarsjóð Aurora um 20 milljónir. Velgerðarsjóðurinn úthlutaði því samtals 102 milljónum í dag.

Fyrsta úthlutun sjóðsins var í janúar 2008 en þá var 100 milljónum úthlutað til ýmissa verkefna hér heima og erlendis.