Fá brot gegn börnum fara til lögreglu

Árið 2006 bárust barnaverndaryfirvöldum 417 tilkynningar vegna gruns um ofbeldi gegn börnum. Af þeim voru 189 tilvik þar sem grunur lék á að ofbeldið væri af hendi foreldris eða annars umönnunaraðila. Um 156 börn er þar að ræða. Mál fimm þessara barna rötuðu inn á borð lögreglu. Kemur þetta fram í nýrri rannsókn Barnaverndarstofu (BVS).

Steinunn Bergmann, félags­ráðgjafi hjá BVS, vann rannsóknina og segir hún alvarlegt ofbeldi gegn börnum hér á landi afar fátítt. „Þó að tilkynningum hafi fjölgað í gegnum árin virðist tilvikum ekki hafa fjölgað,“ segir hún. „Það er afar fátítt að málin séu það alvarleg að þau rati inn á borð lögreglu.“

Barnaverndarnefndum um land allt bárust 634 tilkynningar frá heilbrigðisstofnunum um ofbeldi gegn börnum á síðasta ári. BVS fær tilkynningarnar áframsendar en vinnur ekki með einstök mál, heldur eru þau á borði nefndanna.

Rannsóknin sem BVS hefur nýlega lokið við beinist einungis að árinu 2006 og einskorðast niðurstöðurnar við það ár. „Við erum að skoða hvort það hafi orðin mikil breyting í tilvikum* eftir tiltekinn tíma,“ segir Steinunn. „Það þarf að rannsaka tölurnar yfir ákveðið langt tímabil.“

Björgvin Björgvinsson aðstoðar­yfirlögregluþjónn segir að jafnaði eitt til tvö mál á ári rata inn á borð lögreglu þar sem um ofbeldi gegn börnum sé að ræða. Hann segir ástæðurnar líklega vera þær að barnaverndaryfirvöld séu með hagsmuni barnsins í huga, það er að segja hvort það sé barninu fyrir bestu að draga foreldri eða annan því nákominn fyrir dóm. Í öðru lagi gæti ástæðan verið sú að brotin séu oft á tíðum ekki það alvarleg að þau séu refsiverð.

„Alvarlegustu málin koma þó inn á borð til okkar,“ segir Björgvin. „En þau eru oft mjög erfið viðfangs, þótt þau séu fá.“

sunna@frettabladid.is