Fundu átta kíló af marijúana í Kópavogi

Lögreglan á höfuðborgarsvæðinu lagði hald á rúmlega 6 kíló af marijúana í geymsluhúsnæði í Kópavogi í síðustu viku.

Í tilkynningu frá lögreglunni segir að karl á fimmtugsaldri, sem kom á vettvang, hafi verið handtekinn í þágu rannsóknarinnar en í fórum hans fundust til viðbótar 2kg af marijúana.

Ef miðað er við gangverð á marijúana samkvæmt verðkönnun SÁÁ er virði efnanna um það bil 24 milljónir íslenskra króna.

„Maðurinn hefur játað aðild sína að málinu en nær öllum fíkniefnunum hafði verið haganlega komið fyrir í minni sölueiningum," segir ennfremur en í framhaldinu var leitað heima hjá honum í Garðabænum þar sem var að finna stóra kannanbisræktun sem taldi 170 plöntur.

Lögreglan telur að maðurinn hafi stundað bæði ræktun og sölu fíkniefna í nokkurn tíma.