Dýraspítali og hesthús á hjólum

Dýraspítali og hesthús, samtals 230 fermetrar að stærð, voru flutt í heilu lagi af fyrrverandi svæði hestamannafélagsins Gusts í Glaðheimum og á Kjóavelli, þar sem Gustsmenn hafa fengið úthlutað nýju svæði.

Björgvin Þórisson dýralæknir, sem á og rekur dýraspítalann Drösul, sagði að undirbúningur þessara stórflutninga hefði tekið sex vikur. Við verkið hefðu verið notaðir tveir hundrað tonna kranar. Þá var lengsti vagn landsins notaður til að ferja húsið.

Dýraspítalinn Drösull hóf starfsemi á gamla Gustssvæðinu árið 2003. Að sögn Björgvins eru gerðar bæði stórar og smærri aðgerðir á hestum auk þess sem þar er hægt að leita aðstoðar við eitt og annað sem til fellur.

“Hér koma fjölmargir á hverju ári; hestar með mannavandamál að stærstum hluta”, segir Björgvin.

Að jafnaði eru tveir dýralæknar til þjónustu reiðubúnir á spítalanum en Björgvin segir það innvaxið í starfið að vera alltaf á vakt. Vandamál sem upp koma séu ekki bundin við opnunartíma verslana og sveiflur á milli góðæris og kreppu gæti ekki heldur. “Viðveran er mikil, sama á hverju gengur,” segir Björgvin

Allur gærdagurinn fór í flutningana og kom að þeim fjöldi fólks. Búist var við að verkinu ljúki um hádegi í dag. „Þetta var mjög vel skipulagt og allt gekk að óskum,“ segir Björgvin, sem býst við að opna spítalann aftur um mánaðamótin janúar/febrúar.- jss, shá