Ljósastaurar slógu út - líklega vegna eldinga

„Okkur grunar að kerfið hafi slegið út vegna eldingar,“ segir Gunnlaugur Óskarsson, verkstjóri á rafmagnssviði HS Orku á Suðurnesjum, en stór hluti ljósastaura í Grindavík slógu út í gær.

Gunnlaugur tekur fram að þetta séu aðeins getgátur, „þetta er viðkvæmur búnaður og þolir illa spennusveiflur,“ útskýrir hann en kerfið sem um ræðir er nýlegt og starfsmenn hafa ekki mikla reynslu af því.

Hann segir líklegt, hafi það verið elding, þá hafi henni lostið niður í fyrrinótt. „Það var allavega þannig veður þá,“ segir Gunnlaugur, en alls bilaði stýring í fjórum dreifistöðvum í bænum. Svo virðist sem mikil og óvænt aukning rafmagns hafi slegið stöðvarnar út.

Hann segir samskonar bilun hafa komið upp síðasta vetur, en þá er einnig talið að elding hafi verið sökudólgurinn. Gunnlaugur segir að unnið sé að viðgerðum en hann hafi reyndar ekki hugmynd um það hvenær þeim ljúki.

„Svo þurfum við bara að fara finna lausnir fyrir kerfið svo það bili ekki með þessum hætti,“ segir Gunnlaugur að lokum.