Bóluefnið verður rannsakað

„Þetta er svolítið sérstakt og óvenjulegt," segir Haraldur Briem sóttvarnarlæknir í samtali við fréttastofu. Við sögðum frá því fyrr í dag að fimm stúlkur í Grunnskóla Húnaþings vestra hefðu sýnt ofnæmisviðbrögð eftir að þær voru bólusettar við HPV-veirunni í gær.

Tveir sjúkrabílar voru kallaðir í skólann en um tólf stúlkur voru bólusettar í heildina. Fimm af þeim fengu ofnæmisvibrögð og var ein þeirra send til Reykjavíkur til frekari skoðunar.

Haraldur segir að engar tilkynningar hafi borist áður um ofnæmisviðbrögð eftir bólusetningu gegn veirunni. Hann segir að stúlkunni sem flutt var suður til skoðunar líði vel og þegar hún hafi komið á spítalann hafi öll einkennin verið liðin hjá. En einkenni ofnæmisviðbragðanna eru ógleði, svimi og svitaköst.

Hann segir að málið verði skoðað ítarlega. „Við tilkynnum þetta og það verður skoðað hvort að efnið sé að valda svona vandamálum annars staðar. Þetta er allt skoðað," segir Haraldur. Atvikið hafi ekki verið metið sem svo að það þurfi að stoppa bólusetninguna alveg um allt land.

Von er á tilkynningu frá landlæknisembættinu síðar í dag.