Hátt í 30 manns komu saman í Silfru

Hátt í þrjátíu kafarar voru saman komnir í Silfru í gærkvöldi til að taka þátt í heimsmeti. Vonast er til að yfir þrjú þúsund manns hafi verið í kafi á sama tíma um allan heim. Það var komið kolniðamyrkur við Þingvallavatn í gærkvöldi þegar tugir kafara komu saman með það að markmiði að setja heimsmet í næturköfun, það er að segja flestir kafarar í kafi í einu.

„Heimsmetið er held ég 2700 kafarar, það klikkaði í fyrra, það botnfraus í noregi, svíþjóð og finnlandi svo þeir voru ekki með," segir Haukur Einarsson, formaður Sportkafarafélags Íslands.

Kafað er á 202 stöðum í 27 löndum og var góð stemmning í hópnum áður þeir héldu út í ískalt vatnið. Köfunin gekk gríðarlega vel enda aðstæður til fyrirmyndar og magnað að sjá ljósin frá köfurunum lýsa upp kolsvart vatnið.