Guðlaugur stefnir Birni Val: Óvíst með bótakröfu

Guðlaugur Þór Þórðarson, þingmaður Sjálfstæðisflokksins, hefur ákveðið að stefna Birni Val Gíslasyni, þingmanni Vinstri Grænna, fyrir meiðyrði.

Guðlaugur Þór gaf Birni Val fimm daga frest til að draga ummælin til baka, en sá frestur rann út í gær án þess að Björn Valur fjarlægði þau eða bæðist á þeim afsökunar.

Lögmenn Guðlaugs Þórs vinna því nú að því að útbúa stefnu. Hann segist aðspurður ekki vera búin að hugsa mikið um hvort eða þá hversu miklar fébætur hann ætlar að fara fram á. „Peningar eru ekki það sem mér var efst í huga þegar ég tók þessa ákvörðun,“ segir Guðlaugur Þór.

Ummælin sem hann stefnur Birni Val fyrir voru birtar á bloggsíðu þess síðarnefnda þar sem hann sakar Guðlaug Þór um mútuþægni, og vitnar þar til styrkja sem Guðlaugur fékk í prófkjörum sínum og þóttu meðal annars umdeildir innan Sjálfstæðisflokksins á sínum tíma.

Spurður hvort ásakanir sem þessar séu ekki einfaldlega hluti af orðræðuhefð í íslenskum stjórnmálum segir Guðlaugur Þór: „Þó svo að ýmislegt gangi á í stjórnmálunum þá held ég að þetta sé heldur langt gengið. Viljum við hafa þjóðfélagið þannig að það sé sjálfsagt og eðlilegt að saka fólk um glæpsamlega háttsemi án þess að bera ábyrgð á því? Við værum þá að búa til rógsþjóðfélag. Ég hef ekki áhuga á að búa í slíku samfélagi og held að ansi margir séu mér þar sammála,“ segir Guðlaugur Þór.

Hann segist ekkert sjálfur hafa heyrt í Birni Val nýverið. „Ég á ekki von á því að hann bjóði mér í kaffi,“ segir hann.