Hermir eftir strákunum og rakar á sig hanakamb

Gunnar Helgason leikstjóri leikstýrir Herranótt Menntaskólans í Reykjavík þetta árið. Eins og komið hefur fram er það Draumur á Jónsmessunótt eftir Shakespeare sem varð fyrir valinu, rétt eins og hjá Verzló, og er frumsýning í Norðurpólnum á Seltjarnarnesi í kvöld.

Það er mikil stemmning í hópnum eins og sést á meðfylgjandi myndbandi. Þar lætur Gunnar raka á sig það sem hann kallar hanakamb til að vera eins og strákarnir í verkinu.

40 ár eru liðin síðan Herranótt setti upp Draum á Jónsmessunótt síðast en þá var leikstjóri Hilde Helgason og tónlistarstjóri Atli Heimir Sveinsson. Verkið verður sýnt átta sinnum en nánari upplýsingar um sýningartíma, leikhópinn, miðasölu og fleira er hægt að fá á herranott.mr.is og á Facebook-síðu leikritsins.