DiCaprio sést með fjölda fyrirsæta

Leonardo DiCaprio kúrir sennilega seint kvenmannslaus í kulda og trekki því samkvæmt áströlsku útgáfunni af Daily Telegraph er leikarinn kominn með nýja dömu upp á arminn.

Sú heitir Madalina og það kemur sennilega fáum á óvart að stúlkan er fyrirsæta. Hún er af rúmensku bergi brotin og hefur getið sér gott orð fyrir undirfatamyndir sínar.

Madalina er hins vegar ekki eina konan í lífi leikarans því fjöldi fyrirsæta hefur sést yfirgefa íbúð DiCaprios í Ástralíu. DiCaprio er staddur í Ástralíu að leika í kvikmyndinni The Great Gatsby undir stjórn Baz Luhrman, en samstarf þeirra gaf af sér hina margrómuðu Rómeó og Júlíu.

DiCaprio hefur semsagt augljóslega ekki eytt löngum tíma í að sleikja sárin eftir að leikkonan Blake Lively sparkaði honum fyrir Ryan Reynolds.