Eggert B. Guðmundsson, forstjóri HB Granda, sagði á aðalfundi LÍÚ á dögunum að fyrirliggjandi hugmyndir um breytingar á fiskveiðistjórn séu í hrópandi andstöðu við markmið ríkisstjórnarinnar um að skapa greininni sem best rekstrarskilyrði. Hann sagði að margt af því sem þegar hefur verið gert leiddi síst af öllu til sátta. „Strandveiðar eru eitthvað það alvitlausasta í þessum hugmyndum sem kynntar hafa verið og er þó af nægu að taka,“ sagði Eggert.
Í stefnuyfirlýsingu ríkisstjórnarinnar segir að skapa skuli greininni bestu rekstrarskilyrði sem völ er á og treysta þannig rekstrargrundvöllinn til langs tíma, en jafnframt verði leitað sátta um stjórn fiskveiða.
Í erindinu bar Eggert saman meginmarkmið núverandi stjórnkerfis fiskveiða við þau markmið sem stjórnvöld hafa sett fram um fiskveiðistjórn. Niðurstaða hans var sú að grunnmarkmið um að vernda fiskistofna, stuðla að hagkvæmri nýtingu auðlinda, treysta atvinnu, efla byggð og að skapa sátt á meðal þjóðarinnar um eignarhald og nýtingu auðlinda sjávar væru samrýmanleg en þar með skildu leiðir.
Eggert velti því upp í erindinu hvort einhverjir hefðu beinlínis hag af því að viðhalda ósætti um málefni sjávarútvegsins. - shá
