Alþingi hættir að úthluta styrkjum til samtaka, félaga og einstaklinga

Alþingi mun hætta að úthluta styrkjum til samtaka, félaga og einstaklinga á næsta ári.

Styrkirnir nefnast safnliðir á fjárlögum, en þeir nema nú 759 milljónum króna frá þinginu auk 653 milljóna sem koma frá ráðuneytum, að sögn Oddnýjar G. Harðardóttur, formanns fjárlaganefndar. Framvegis mun þingið aðeins ákveða hversu háar upphæðir renna til einstakra málaflokka en láta lögbundnum sjóðum, sveitarfélögum, ráðuneytum og fleirum eftir að úthluta styrkjum.

Safnliðirnir hafa verið gagnrýndir sem kjördæmapot og „gamaldags fyrirgreiðslufyrir-komulag," eins og Valgerður Bjarnadóttir þingmaður Samfylkingarinnar orðaði það í fyrirspurn um safnliði á síðasta ári.

„Allir flokkar hafa gagnrýnt þetta og okkur fannst tími til kominn að gera breytingar á þessu," segir Oddný G. Harðardóttir. Hún segir að þar sem bæði Alþingi og ráðuneytin hafi úthlutað styrkjum hafi það stundum gerst að sömu aðilarnir hafi fengið úthlutað styrkjum frá báðum.

Mikill tími fjárlaganefndar fer í viðtöl og vinnu vegna styrkjanna. Þannig á það ekki að vera að mati Oddnýjar, heldur á nefndin að geta einbeitt sér að stærri málum.

Breytingunum nú er ætlað að gera úthlutanir gegnsærri og auka traust á því hvernig fjármunum ríkisins er skipt. „Því það hefur verið orðrómur uppi um að þingmenn noti þetta til að hygla sínu kjördæmi og vinum sínum jafnvel." Þá eiga breytingarnar að bæta stjórnsýsluna og yfirsýn yfir einstaka málaflokka. „Það er mjög neytendafjandsamlegt að Alþingi skuli vera að úthluta, af því að Alþingi fellur ekki undir stjórnsýslulög." Því beri Alþingi ekki að skýra úthlutun, sem ráðuneyti og sveitarfélög þurfa hins vegar að gera.

Oddný var formaður vinnuhóps fjárlaganefndar sem í sátu auk hennar Þorgerður Katrín Gunnarsdóttir, Þór Saari og Þuríður Backman. Samstaða var um breytingarnar og verður öllum umsóknum áfram fundinn farvegur. Nánari útfærsla á breytingunum verður kynnt í haust. - þeb