Fjölnir: Aðgát skal höfð í nærveru sálar

„Mér finnst þetta fáránlegt," segir Fjölnir Þorgeirsson, hestamaður með meiru.

Fjölnir virðist vera fyrirmynd persónu í bókinni Lýtalaus eftir Þorbjörgu Marinósdóttur eða Tobbu Marinós sem kom út fyrir helgi.

Persónan heitir reyndar Fjölnir Þorleifsson og verður á vegi aðalpersónu bókarinnar, Lilju, í Ríkinu. Þau eru síðan gestir í sömu veislu og verða vinir á Facebook. Fjölni Þorleifssyni er lýst nokkuð ítarlega og það velkist varla nokkur lesandi í vafa um að umrædd persóna er byggð á Fjölni Þorgeirssyni, hann er meðal annars klæddur í flíspeysu, reiðbuxur og reiðskó þegar Lilja og hann rekast fyrst á hvort annað. „Hesta- og leðurlykt fyllir freknótt nefið á mér," skrifar Tobba í bókinni.

Fjölnir er hins vegar ekki par sáttur með rithöfundinn. „Hún sendi mér einhvern texta og spurði hvort mér væri sama. Ég svaraði til baka og sagði að mér fyndist hún vera á lágu plani og mér væri ekki sama," segir Fjölnir og það er augljóst að þetta fer mjög fyrir brjóstið á honum. „Ég vil bara minna á að aðgát skal höfð í nærveru sálar og ég hefði aldrei blikkað hana í Ríkinu. Því hún er ekki mín týpa, ég er smekkmaður á konur," segir Fjölnir.

„Þetta er skáldsögupersóna en ég sagði honum auðvitað frá þessu, ég vildi ekki vera með nein leiðindi. Auðvitað eins og með allt í bókinni, þá er hún með skírskotanir í raunveruleikann, vini mína og umhverfið og hann verður bara að komast yfir þetta. Mér finnst hann ekki einu sinni fara illa út úr bókinni," segir Tobba og bætir við að Fjölnir ætti bara að lesa bókina, hann hefði örugglega bara gaman af henni.

Fyrsta bók Tobbu, Makalaus, naut töluverðra vinsælda í fyrra. Hún varð síðan að sjónvarpsþáttaröð sem sýnd var á Skjá einum. Lýtalaus er sjálfstætt framhald þeirrar bókar.

freyrgigja@frettabladid.is