Sýknaður af sérstaklega hættulegri líkamsárás

Hæstiréttur staðfesti sýknudóm héraðsdóms yfir karlmanni sem var ákærður fyrir sérstaklega hættulega líkamsárás á veitingastaðnum Hressingarskálanum í miðborg Reykjavíkur í nóvember árið 2009.

Maðurinn var ákærður fyrir að hafa, í félagi við óþekktan aðila, slegið annan mann ítrekuðum hnefahöggum í andlit, velt borði yfir hann þar sem hann lá og sparkað í höfuð hans.

Í dómnum kemur fram að ýmsir annmarkar hafi verið á lögreglurannsókn málsins og að rannsóknaraðferðir lögreglu hafi ekki veirð í samræmi við reglur sem gilda um sakbendingu.

Dómurinn taldi að ekki yrði ráðið með vissu af myndbandsupptöku úr öryggismyndavélum að maðurinn hafi verið sá sem veitti manninum áverka og þá leiddi framburður vitna ekki heldur til þeirrar niðurstöðu.

Það var því talið ósannað að maðurinn hefði veist að manninum með þeim hætti sem lýst var í ákæru og hann því sýknaður.