Kempur frá Malí og Kúbu spila í Hörpunni

Afrocubism, stórsveit tónlistarmanna frá Kúbu og Malí leikur á tónleikum í Hörpu hinn 28. júní í sumar. Það er Þorsteinn Stephensen hjá Hr. Örlygi sem stendur að tónleikunum.

Afrocubism var upprunalega hugmyndin að Buena Vista Social Club árið 1996. Þá urðu vandræði með vegabréfsáritanir til þess að tónlistarmennirnir náðu ekki saman og Kúbverjarnir fengu að eiga sviðið. Fjórtán árum síðar var ákveðið að láta gamla drauminn rætast og tónlistarmönnunum var smalað í hljóðver. Samnefnd plata Afrocubism kom út í október í fyrra og hlaut lof gagnrýnenda. Um þessar mundir er Afrocubism á tónleikaferðalagi um Evrópu og spilar meðal annars í Royal Albert Hall áður en kemur að tónleikunum í Hörpu.

Fremstur í flokki Kúbverjanna er maðurinn með kúrekahattinn, Elias Ochoa, sem söng hið eftirminnilega lag Buena Vista Social Club, Chan Chan. Upprunalegu boðsgestirnir frá Malí eru hinn margverðlaunaði Bassekou Kouyate sem spilar á ngoni-lútu, og gítarleikarinn Djelimady Tounkara. Með þeim eru söngvarinn Kasse Mady Diabaté, Lassana Diabaté sem spilar á balafon, og Toumani Diabaté sem spilar á afríska strengjahljóðfærið kora. Diabaté hefur meðal annars spilað með Damon Albarn og Björk og hlaut Grammy-verðlaunin á þessu ári fyrir plötuna „Ali and Toumani" sem var síðasta samstarfsplata hans og gítarleikarans þekkta Ali Farka Touré.

-hdm