Ferðamaður stal dollurum af flugfreyju Icelandair

Bandarískur ferðamaður var handtekinn á Logan flugvelli í Boston í Bandaríkjunum í gær, sakaður um að hafa stolið 300 dollurum af íslenskri flugfreyju um borð í vél Icelandair, þegar vélin var á leið til Logan.

Lögregla handtók manninn strax eftir lendingu vélarinnar en talið er að hann hafi sturtað megninu af peningunum niður um klósettið, eftir að upp um hann komst.

Á vefnum The Boston Channel segir að verið að að leita að peningunum í skolptanki vélarinnar, en maðurinn á að koma fyrir dómara í Boston í dag.