Mótmæli í París til stuðnings níumenningunum

Mótmælendur sýndu níumenningunum svokölluðu stuðning fyrir utan íslenska sendiráðið í París í dag. Samkvæmt stuðningssíðu níumenninganna, var stórum borða komið fyrir við inngang sendiráðsins. Á honum stóð: „Pólitískar ofsóknir á Íslandi - Samstaða með nímenningunum! (Reykjavík Nine)."

Þá var frönskum upplýsingabæklingi um dómsmálið dreift til gangandi vegfarenda og fólks sem fór inn og út úr sendiráðinu.

Skömmu eftir að mótmælin hófust kom franska lögreglan á vettvang. Þeir fóru inn í sendiráðið en komu stuttu síðar aftur út og kröfðu mótmælendur um skilríki. Í kjölfarið var kallað eftir liðsauka og komu fleiri lögreglubílar á svæðið. Stuttu seinna yfirgaf fólkið svæðið en hafði þá verið þar í rúma klukkustund.

Mótmælin eru hluti af alþjóðlegu kalli mótmælenda þar sem grasrótahópar eru hvattir til þess að sýna samstöðu vegna dómsmálsins yfir níumenningunum sem hefst á þriðjudaginn.

Níumenningarnir hafa meðal annars, eins og kunnugt er, verið ákærð fyrir árás á Alþingi.

Frekari aðgerða eru boðaðar samkvæmt síðunni. Annað kvöld, sunnudaginn 16. janúar, verða tónleikar með hollenska trúbadornum Armand, í Den Bosch, í Hollandi.

Í London hefur verið kallað eftir mótmælum við íslenska sendiráðið þar í borg, mánudaginn 17. janúar. Í Berlín fer svo fram upplýsingafundur um málið þann 18. janúar og hefur fólkið sem að honum stendur boðað fleiri atburði í kringum og eftir dómsmálið. Og í lok janúar, þann 31. nánar tiltekið, verða samstöðu- og styrktartónleikar í Polotti tökuhúsinu í Grenoble, Frakklandi.

Vísir ræddi við utanríkisráðuneytið fyrir helgi og spurði hvort nokkur viðbúnaður væri vegna alþjóðlega samstöðuátaksins en fékk þau svör að svo væri ekki.