Ingimundur: Sagði víst frá Icesave-þaki á fundi samráðshópsins

Ingimundur Friðriksson, fyrrverandi Seðlabankastjóri, var fyrsta vitnið sem kom fyrir Héraðsdóm Reykjavíkur í morgun þegar aðalmeðferð í máli ákæruvaldsins gegn Baldri Guðlaugssyni, fyrrverandi ráðuneytisstjóra í fjármálaráðuneytinu, var haldið áfram.

Ingimundur staðfesti þar að hann hefði tilkynnt á fundi samráðshóps um fjármálastöðugleika og viðbúnað að breska fjármálaeftirlitið hefði tekið ákvörðun um að 5 milljarða punda hámark yrði sett á innistæður á Icesave-reikningum Landsbankans í Bretlandi. Fundargerð af fundi hópsins frá 31. júlí 2008 var borin undir Ingimund þar sem þetta kom fram og sagðist hann ekki efast um að það væri rétt sem stæði í fundargerð. Hann sagðist þó ekki muna nákvæmlega hvernig hann hafi fengið upplýsingar um þetta hámark en það hafi ekki verið frá fyrstu hendi.

Aðalmeðferð í máli Baldurs hófst á miðvikudag. Skýrsla var þá tekin af Baldri, sem er ákærður fyrir innherjasvik með því að hafa hagnýtt sér upplýsingar sem hann bjó yfir stöðu sinnar vegna. Baldur seldi öll hlutabréf sín í Landsbankanum dagana 17. og 18. September 2008. Baldur átti sæti í aðurnefndum samráðshópi.

Eitt þeirra atriða sem tekið er fram í ákæru á hendur Baldri er að hann hafi vitað um ákvörðun breska fjármálaeftirlitsins um 5 milljarða hámarkið. Fyrir dómi á miðvikudag bar hann hins vegar að það væri ekki rétt að ákvörðun hefði verið tekin um þetta hámark heldur að það hafi aðeins komið til umræðu.

Upphaflega stóð til að Ingimundur gæfi símaskýrslu þar sem hann er búsettur í Noregi en ákveðið var að boða hann fyrr dóminn þar sem ekki var vissa um að lagaheimildir væru fyrir því að hann gæfi aðeins skýrslu í gegn um síma.

Í fundargerð samráðshópsins frá 31. júlí segir að þar hafi verið sérstaklega minnt á trúnaður gilti um að ákvörðun hefði verið tekin um 5 milljarða punda hámarkið á Icesave-reikningunum.

Næsta vitni á dagskrá er Tryggvi Pálsson, forstöðumaður fjármálasviðs Seðlabankans. Á eftir honum ber vitni Þórður Örlygsson, regluvörður Landsbankans, þá Gunnar Viðar, forstöðumaður lögfræðiráðgjafar Landsbankans og loks Sigurjón Þ. Árnason, fyrrverandi bankastjóri Landsbankans.