Danir hrifnir af Ofsa Einars Kára

Einar Kárason fær lofsamlega dóma í Weekendavisen í Danmörku fyrir bók sína Ofsa. Víkingar fornaldar þjáðust víst af aðskilnaðarkvíða og ástleysi.

„Þetta er mjög skemmtilegt og hann sér alls konar hluti sem mér hafði ekki dottið í hug, eins og að það hafi verið eitthvað freudískt við það að skríða ofan í sýrukar og vera bjargað af konu,“ segir Einar Kárason rithöfundur. Hann er áberandi í menningarkálfi danska helgarblaðsins Weekendavisen sem kom út í gær. Inni í kálfinum var nokkuð ítarlegt viðtal við skáldið þar sem Einar fer yfir farinn veg en á forsíðunni er hins vegar lofsamlegur dómur um bókina eftir Iben Tandgaard.

Einar segir að Danir hafi ekki alltaf verið hrifnir af bókum hans, sumir hafi gefið lítið fyrir Storm og fundist hann vera að gera grín að dönsku velferðarkerfi. Rithöfundurinn er hins vegar hrifinn af dóminum hjá Tandgaard. „Það er ekki oft sem dómar veita manni innblástur en þessi gerir það.“ Skáldið hyggst heimsækja Dani í apríl og lesa upp úr bókinni en hún er einnig að koma út í Þýskalandi. „Þetta er sjöunda bókin mín sem kemur þar út, Þjóðverjar hafa alltaf sýnt mér mikla tryggð.“

En aftur að dómnum. Tand­gaard hrósar Einari fyrir nálgun hans á Sturlungaöld og hvernig honum tekst að lýsa hugarheimi fólks þess tíma. Tandgaard kemst að þeirri niðurstöðu að sennilega hafi margir hinna hugrökku kappa þjáðst af aðskilnaðarkvíða og þá hafi bara vantað örlitla ást. „Og hér er kannski búið að afhjúpa hina karlmannlegu íslensku þjóðarsál – Einar ætti kannski að passa sig á blóðugum öxum þegar hann spilar næst póker með vinum sínum.“

freyrgigja@frettabladid.is