Krafa um að dælingu verði hætt

Hvergerðingar krefjast þess að niðurdælingu jarðhitavökva frá Hellisheiðarvirkjun verði hætt, sagði Aldís Hafsteinsdóttir, bæjarstjóri í Hveragerði, í viðtali við Fréttablaðið í gærkvöldi. Hún var þá stödd á fjölmennum íbúafundi á Hótel Örk sem Orkuveita Reykjavíkur efndi til. Tilefnið eru skjálftahrinur síðustu vikna sem hafa valdið íbúum í Hveragerði óþægindum og ugg.

Fundurinn stóð enn þá sem hæst þegar Fréttablaðið fór í prentun en Aldís sagði jafnframt að forsvarsmenn OR bæru fyrir sig kvaðir í starfs- og virkjanaleyfi Hellisheiðarvirkjunar en þar er gert að skilyrði að dæla skuli affallsvatni virkjunarinnar niður fyrir 800 metra dýpi ofan í jarðhitakerfið. Það á að efla sjálfbærni auðlindanýtingarinnar. Á fundinum var kynnt ný samantekt jarðvísindamanna um skjálftavirknina en úttektin var gerð að frumkvæði iðnaðarráðuneytisins.

Skjálftahrinurnar hófust 8. september og frá þeim tíma hafa mælst um 1.900 skjálftar. Af þeim hafa 26 mælst frá 2,5 til 3,8 á Richter sem flestir hafa fundist greinilega í Hveragerði og þeir stærstu einnig á höfuðborgarsvæðinu. - shá