Sautján ára stúlka framvísaði fölsuðum skilríkjum á veitingastað

Það var mikið að gera hjá lögreglunni í Vestmannaeyjum í vikunni sem leið og þá sérstaklega um helgina en nokkuð var um útköll vegna ölvunaróláta.

Aðfaranótt sunnudags reyndi stúlka á 18. aldursári að komast inn á veitingastaðinn Volcano með fölsuðum skilríkjum en árvökull dyravörður sá í gegnum fölsunina og lét lögreglu vita. Stúlkan viðurkenndi fölsunina og var henni gerði grein fyrir alvarleika málsins.

Ein eignaspjöll voru tilkynnt í vikunni en um var að ræða rúðubrot í verslun Grétars Þórarinssonar við Heiðarveg.  Er talið að rúðan hafi verið brotin aðfaranótt sl. laugardags og eru þeir sem einhverjar upplýsingar hafa um hver þarna var að verki beðinn um að hafa samband við lögreglu.

Einn þjófnaður var tilkynntur í vikunni en aðfaranótt sl. laugardags var tösku stolið af borði í fatahengi veitingastaðarins Volcano.  Þeir sem upplýsingar hafa um hver þarna var að verki er beðinn um að hafa samband við lögreglu.

Lögreglan vill minna gangandi vegfarendur á að nota endurskinsmerkin en það er margsannað að þau hafa komið í veg fyrir slys.  Sérstaklega eru foreldrar hvattir til að láta börn sín bera endurskinsmerki og koma þannig í veg fyrir alvarleg slys.