Vitnaleiðslum lokið í Baugsmáli

Vitnaleiðslum í skattahluta Baugsmálsins lauk nú rétt eftir klukkan tvö í dag. Alls voru níu vitni leidd fyrir dóminn. Þar af voru fimm fyrir hádegi en fjögur nú eftir hádegi. Þeirra á meðal var Anna Þórðardóttir endurskoðandi, sem meðal annars annaðist skattframtöl fyrir Tryggva Jónsson, fyrrverandi framkvæmdastjóra Baugs, á árunum 2000 til ársins 2002. Í morgun voru meðal annars Stefán Hilmarsson, fyrrverandi endurskoðandi Baugs, Jón Björnsson, fyrrverandi forstjóri Haga, Jóhannes Jónsson, oftast kenndur við Bónus, og Óskar Magnússon, sem var forstjóri Hagkaupa leiddir fyrir dóminn sem vitni. Umrædd mál snýst um ákæru á hendur Jóni Ásgeiri Jóhannessyni, Kristínu Jóhannesdóttur, Tryggva Jónssyni auk fjárfestingafélagsins Gaums fyrir stórfelld skattalagabrot.