Vodafone ekki til rannsóknar

Fyrirtækið Vodafone er ekki til rannsóknar eftir að í ljós kom að grunaðir menn hefðu verið upplýstir um að það væri verið að hlera þá. Í fréttum Fréttablaðsins, Vísis og Bylgjunnar í dag kom fram að starfsmenn tveggja símafyrirtækja séu grunaðir um að hafa upplýst grunaða menn um að símtæki þeirra væru hleruð vegna rannsókna á vegum Embættis sérstaks saksóknara.

Vegna fréttanna óskar Vodafone eftir því að koma eftirfarandi á framfæri:

"Engar athugasemdir hafa borist Vodafone vegna vinnulags við framkvæmd hlerana eða þeirra starfsmanna sem vinna með lögreglu að framkvæmdinni að undangengnum dómsúrskurði. Þvert á móti hefur bæði vinnulagi Vodafone og einstökum starfsmönnum verið hrósað fyrir mikla fagmennsku.

Í kjölfar áðurnefndra frétta óskaði Vodafone eftir upplýsingum um umrædd mál hjá lögreglu. Þar fengust þau svör, að engar upplýsingar yrðu veittar Vodafone enda væri fyrirtækið ekki til rannsóknar."