Kærður fyrir að nauðga pilti - málið fellt niður

Mál gegn rúmlega þrítugum karlmanni, sem kærður var fyrir nauðgun af tvítugum pilti í heimahúsi í Hafnarfirði, hefur verið fellt niður. Eftir rannsókn lögreglu og Ríkissaksóknara var ekki talið líklegt að ákæra myndi leiða til sakfellingar.

Málið hefur verið til skoðunar í kerfinu í nokkuð langan tíma en það var Fréttablaðið sem sagði fyrst frá kærunni í maí á síðasta ári. Þar kom fram að maðurinn hefði boðið piltinum, sem er um tvítugt, í samkvæmi heim til sín í Hafnarfirði.

Þegar þangað var komið var enginn nema húsráðandi á staðnum. Áfengi var haft um hönd og sofnaði pilturinn í kjölfarið. Hann vaknaði síðan við að maðurinn var að misnota hann.

Pilturinn fór nokkru síðar á neyðarmóttöku fyrir fórnarlömb kynferðislegs ofbeldis á Landspítalanum og kærði nauðgunina. Þetta mun ekki vera í fyrsta skipti sem maðurinn er sakaður um nauðgun, því fréttastofa birti viðtal við annan pilt sem hafði svipaða sögu að segja þegar málið kom upp á síðasta ári.

Rannsókn lögreglu á málinu lauk í upphafi þessa árs en maðurinn hafði flutt búferlum erlendis í kjölfar kærunnar. Því var erfitt að ná á hann vegna málsins. Að lokum var það síðan sent til embætti Ríkissaksóknara sem fór yfir gögn í málinu.

Samkvæmt upplýsingum frá Ríkissaksóknara var málið síðan látið niður falla, þar sem það þótti ekki líklegt til sakfellingar.