Göng undir Vaðlaheiði talin standa undir sér

Nýir endurútreikningar um arðsemi Vaðlaheiðarganga benda til að veggjöld muni standa undir göngunum og hófust viðræður í dag við verktaka um næstu skref. Enn vantar þó grænt ljós frá ríkisstjórn.

Opnun tilboðanna fyrir þremum vikum var, fremur en hitt, talin auka líkur á því að ráðist yrði í þetta viðamikla verkefni enda reyndist lægsta boð hálfum milljarði króna undir kostnaðaráætlun. Engu að síður var ákveðið að yfirfara alla útreikninga og forsendur þeirra.

Samkvæmt heimildum Stöðvar 2 liggur niðurstaða ráðgjafa hlutafélagsins nú fyrir og er hún sú að veggjöld muni greiða upp kostnaðinn við jarðgöngin á 25 árum, miðað við gefnar forsendur um framkvæmdakostnað, vaxtakjör og tekjur af umferð. Það er til marks um hversu jákvæð þessi tíðindi þykja að í dag var haldinn fyrsti formlegi fundur Vegagerðarinnar með lægstbjóðanda, ÍAV og Marti Contractors, þar sem farið var yfir tilboðið, en þeir bjóðast til að grafa þessi rúmlega sjö kílómetra löngu göng fyrir tæpa 8,9 milljarða króna.

Málið er þó ekki komið í höfn því fá þarf staðfestingu á því að ríkissjóður kaupi skuldabréf af Vaðlaheiðargöngum hf. en áður en það gerist er stefnt að því að nýju arðsemisútreikningarnir verði lagðir fyrir umhverfis- og samgöngunefnd Alþingis.