Tillögur að orkustefnu

Stýrihópur um mótun heildstæðrar orkustefnu fyrir Ísland skilaði í dag tillögum sínum til Katrínar Júlíusdóttur, iðnaðarráðherra.

Orkustefnan er byggð svoleiðis upp að fyrst er sett fram leiðarljós; þá eru meginmarkmið ákveðin í samræmi við leiðarljósið; loks eru afmarkaðari leiðir ákvarðaðar út frá þeim meginmarkmiðum.

Leiðarljós orkustefnunnar er „Að orkubúskap Íslands verði hagað með sjálfbærum hætti, samfélaginu og almenningi til hagsbóta."

Meginmarkmið stefnunnar kristallast m.a. í eftirfarandi þáttum:

Við nýtingu orkuauðlinda verður borin virðing fyrir umhverfi og náttúru.

Mótuð verður stefna um skattlagningu orkuauðlinda svo þjóðin njóti arðs af sameiginlegum orkuauðlindum.

Framlegð og arðsemi orkubúskaparins verður hámörkuð. Ekki skal ganga á hana vegna byggða- eða atvinnusjónarmiða í héraði.

Dregið verður úr notkun og innflutningi jarðefnaeldsneytis, en eins og er flytja Íslendingar inn jarðefnaeldsneyti fyrir 44 milljarða króna á ári hverju.

Næstu daga verða tillögur stýrihópsins ítarlega ræddar, jafnt í ríkisstjórn sem á þingi.

Tillögur hópsins má kynna sér hér.