Icelandair vann markaðsverðlaun fyrirtækja

Íslensku markaðsverðlaunin 2011 voru afhent í dag á hótel Nordica.

Þrjú fyrirtæki voru tilnefnd til markaðsverðlauna fyrirtækja, en þau voru veitt í 21. sinn í dag. Fyrirtækin voru Icelandair, Nova og Össur. Verðlaunin í ár hlaut Icelandair. Birkir Hólm Guðnason, framkvæmdastjóri Icelandair, tók við verðlaununum. Hann þakkaði Íslensku auglýsingastofunni gott samstarf og tilkynnti að fyrirtækið myndi á næsta ári enn auka við markaðsstarf sitt og leggja í það tvo milljarða króna.

Þá var Jón Ásbergsson, framkvæmdastjóri Íslandsstofu, valinn markaðsmaður ársins 2011. Verðlaunin hlaut hann ekki síst fyrir að stýra herferðinni Inspired by Iceland, sem þótti fantavel heppnuð og uppskar meðal annars verðlaun á erlendri grundu. Við verðlaunaafhendinguna hélt Ólafur Ragnar Grímsson, forseti, ræðu þar sem hann jós Jón lofi og sagði hann persónulega hafa hjálpað til við að opna nýjar leiðir Íslands erlendis.