Óli Tynes borinn til grafar

Útför Óla Tynes fréttamanns var gerð frá Fossvogskirkju í dag, að viðstöddu fjölmenni. Séra Pétur Þorsteinsson, prestur Óháða safnaðarins, jarðsöng. Samstarfsmenn Óla af fréttastofu Stöðvar 2 og Vísis báru kistuna úr kirkju, þau Telma Tómasson, Edda Andrésdóttir, Heimir Már Pétursson, Gissur Sigurðsson, Freyr Einarsson, Haukur Holm, Gunnar Reynir Valþórssson og Kristján Már Unnarsson. Jarðsett var í Gufuneskirkjugarði.

Óli Tynes Jónsson, eins og hann var skírður, var sá starfsmaður fréttastofunnar sem átti að baki lengstan starfsferil í blaðamennsku. Hann byrjaði á Vísi fyrir 49 árum og vakti landsathygli þegar Þorskastríðsátök stóðu sem hæst með fréttum um borð í varðskipum og freigátum. Hann vann einnig á Morgunblaðinu, Alþýðublaðinu, Helgarpóstinum og ýmsum tímaritum, var um tíma í ferðaþjónustu, bæði hjá Arnarflugi og sem fararstjóri erlendis, en síðustu 20 ár mest á Stöð 2, Bylgjunni og Vísi, einkum í erlendum fréttum.

Óla Tynes verður nánar minnst í Íslandi í dag að loknum fréttum í kvöld og rætt við nokkra samstarfsmenn hans í gegnum tíðina. Þá hefur nokkrum eftiminnilegum fréttum Óla af Vísi verið safnað saman á einn stað.