Framboð Hönnu Birnu líkist framboði Davíðs Oddssonar 1991

Tímasetningin á framboði Hönnu Birnu Kristjánsdóttur til formanns Sjálfstæðisflokksins vekur athygli í sögulegu samhengi.

Hanna Birna tilkynnti framboð sitt rúmum13 dögum fyrir landsfund Sjálfstæðisflokksins sem haldinn verður þann 17. þessa mánaðar.

Síðast þegar framboð gegn sitjandi formanni flokksins kom fram árið 1991 var það einnig tilkynnt 13 dögum fyrir landsfund. Þetta var þegar Davíð Oddsson þáverandi borgarstjóri bauð sig fram gegn Þorsteini Pálssyni. Raunar var Davíð nokkuð legið á hálsi fyrir hversu bratt framboð hans bar að. Um það höfðu þó verið vangaveltur lengi á undan eins og um framboð Hönnu Birnu.

Annað sem þessi framboð eiga sameiginlegt er að það er oddviti borgarstjórnarflokks Sjálfstæðismanna sem býður sig fram gegn formanninum. Að vísu er Hanna Birna ekki í sæti borgarstjóra eins og Davíð var árið 1991.

Einnig má nefna að Kjartan Gunnarsson fyrrum framkvæmdastjóri flokksins er talinn einn helsti bakhjarl Hönnu Birnu. Hann var líka talinn helsti bakhjarl Davíðs Oddssonar árið 1991.

Það er einnig sameiginlegt að formaður flokksins þykir standa veikt. Í tilviki Þorsteins var það sökum þess að ríkisstjórn sem hann veitti forstöðu féll áður en kjörtímabilið var úti. Í tilviki Bjarna Benediktssonar eru það tengsl hans við umdeildar viðskiptafléttur fyrir hrunið og afstöðu hans í Icesavemálinu en mikill meirihluti Sjálfstæðismanna var ósammála honum í því máli.