Húmanistar verðlauna Pál Óskar

Páll Óskar Hjálmtýsson söngvari fékk í gær Húmanistaviðurkenningu Siðmenntar. Verðlaunin eru árviss viðburður og hafa þau verið veitt samfellt í sjö ár. Í tilkynningu frá Siðmennt segir að Páll Óskar hafi árum saman barist fyrir mannréttindum samkynhneigðra og með jákvæðni sinni, sköpunarkrafti og einlægri framkomu verið landsmönnum öllum kærkomin fyrirmynd.

Þá var Fræðslu- og vísindaviðurkenningu Siðmenntar var úthlutað í fjórða sinn. „Árið 2008 hlaut Pétur Tyrfingsson sálfræðingur hana, árið 2009 hlaut Orri Harðarson hana og árið 2010 Ari Trausti Guðmundsson. Eitt af megin umfjöllunarefnum félagsins er þekkingarfræðin og stuðningur við vísindalega þekkingarleit og fræðslu. Félagið veitir viðurkenningu þeim aðila eða samtökum sem hafa fært þjóðinni mikilvægt framlag í þessum efnum. Að þessu sinni eru það Stjörnuskoðunarfélag Seltjarnarness og  Stjörnufræðivefurinn sem hljóta viðurkenninguna,“ segir ennfremur, en einnig flutti Ögmundur Jónasson, Mannréttindaráðherra, ávarp við upphaf viðburðar.