Flugvöllurinn verði lögfestur í Vatnsmýri

Ellefu þingmenn Sjálfstæðisflokks og Framsóknarflokks vilja að staðsetning Reykjavíkurflugvallar í Vatnsmýri verði lögfest og að óvissu um framtíð hans verði þannig eytt. Lagafrumvarp þessa efnis var lagt fram á Alþingi í gær.

Fyrsti flutningsmaður er sjálfstæðismaðurinn Jón Gunnarsson. Með honum standa að frumvarpinu Ragnheiður Ríkharðsdóttir, Árni Johnsen, Birkir Jón Jónsson, Einar K. Guðfinnsson, Eyrún Ingibjörg Sigþórsdóttir, Gunnar Bragi Sveinsson, Illugi Gunnarsson, Kristján Þór Júlíusson, Tryggvi Þór Herbertsson og Ólöf Nordal.

Þingmennirnir vilja að lögfest verði að miðstöð innanlandsflugs skuli starfrækt á Reykjavíkurflugvelli í Vatnsmýri í Reykjavík. Markmið laganna er að tryggja tilvist miðstöðvar innanlandsflugs í næsta nágrenni við helstu heilbrigðis-, mennta- og stjórnsýslustofnanir landsins.

Í greinargerð segja þingmennirnir meðal annars að brýnt sé að marka stefnu um framtíð Reykjavíkurflugvallar. Sú óvissa sem ríki um framtíð flugvallarins komi sér illa fyrir hagsmunaaðila og brýnt sé að henni verði eytt svo fljótt sem verða má.

Fyrir flugfarþega sé staðsetning flugvallarins í Reykjavík mjög hentug. Flutningur miðstöðvar innanlandsflugs til Keflavíkurflugvallar væri veruleg afturför í flugsamgöngum innan lands. Áhrif þess á ferðaþjónustu og tengsl landsbyggðar við höfuðborgarsvæðið séu óásættanleg.