Líkamsárás í Reykjavík

Tilkynnt var um eina líkamsárás í miðbæ Reykjavíkur í nótt. Þar var maður laminn með flösku og náði lögregla að góma árásarmanninn á leið af vettvangi. Hann var fluttur niður á lögreglustöð en síðan leyft að fara að skýrslutökum loknum. Að öðru leyti var nóttin róleg, einungis tveir gistu fangageymslur og einn var kærður fyrir ölvun við akstur.

Slökkviliðið á höfuðborgarsvæðinu fór í eitt útkall í gærkvöldi á pizzastaðinn Rizzo í Árbænum. Þar hafði verið tilkynnt um reyk en þegar slökkvilið kom á staðinn reyndist allt með kyrrum kjörum.

Á akureyri ók vörubíll útaf í hálku við Jónasarlund í Öxnardal í gærkvöld, enginn slasaðist að sögn lögreglu. Þá var einn tekinn fyrir ölvunarakstur í morgunsárið.

Nóttin var tíðindalítil á landsbyggðinni. Einn var tekinn fyrir ölvun við akstur í umdæmi lögreglunnar á Egilsstöðum og missti hann bílprófið til bráðabirgða.