Dráttartaugin slitnaði - Þór í jómfrúarútkallið

Dráttartaug á milli togskipsins Hoffells og Ölmu, hundrað metra flutningaskips frá Kýpur, slitnaði nú laust fyrir hádegi eftir að Landhelgisgæslan kom því til bjargar í nótt. Stýrisbúnaður skipsins bilaði og gæslan var því kölluð út í umfangsmiklar björgunaraðgerðir. Í þeim var Þór sendur í jómfrúarútkallið sitt.

Klukkan þrjú í nótt barst Landhelgisgæslunni aðstoðarveiðni frá Birni, dráttarbátnum á Höfn í Hornafirði vegna flutningaskipsins Ölmu sem sigli meðal annars til Vestmannaeyja og Hornafjarðar. Lóðsinn var að aðstoða flutningaskipið út fyrir ósinn á Hornafirði þegar uppgvötvaðist að stýri skipsins vikaði ekki. Stýrisblaðið var farið, en skrúfa og vél skipsins voru í lagi. Lóðsinn tók þá skipið í tog og óskaði eftir allri aðstoð.

Gæslan kallaði þá á Ingibjörgu, björgunarskip Landsbjargar á Hornafirði og togskipið Hoffell sem var um sex mílur úti frá Ölmu. Þá var dráttarbáturinn Vött frá Reyðarfirði kallaður á staðinn og Lóðsinn í Vestmannaeyjum settur í viðbragðsstöðu. Þyrluáhöfn gæslunnar var kölluð út sem flaug yfir svæðið og varðskipið Þór var sett í viðbragðsstöðu.

Á svæðinu var SA 10-15 m/sek en tók að snúast í SV-hvassviðri. Því var nauðsynlegt að koma skipinu sem fyrst Austur fyrir Stokksnes.

Um klukkan sex var svo komin dráttartaug á milli Ölmu og Hoffells og þá var hættuástandi aflýst. Öðrum skipum var snúið til hafnar en þyrlan er á svæðinu ef á aðstoð þarf að halda. Alma verður nú dregin austur fyrir stokksnes og svo í var á Berufirði eða Reyðarfirði.