Hvetja sem flesta til að tjalda á Austurvelli

Mótmælendur sem kalla hreyfingu sína Occupy Reykjavík, og kenna sig þannig við hina sístækkandi bandarísku hreyfingu Occupy Wall Street, gistu í tjöldum á Austurvelli í nótt.

Mótmælendurnir hafa nú fengið leyfi yfirvalda til að tjalda á svæðinu, en eftir því sem fréttastofa kemst næst er það í fyrsta sinn sem nokkur fær leyfi til að tjalda á Austurvelli.

Í leyfinu kemur fram að heimiluð séu friðsamleg mótmæli á Austurvelli. Gert er að skilyrði að tjöld verði ekki á sama stað lengur en 2 daga til að hlífa grasinu. Leyfið veitti Þórólfur Jónsson, garðyrkjustjóri hjá Reykjavíkurborg, veitti 3. nóvember síðastliðinn. Það gildir til 9. nóvember næstkomandi.

Í tilkynningu á facebook-síðu hreyfingarinnar er almenningur hvattur til að mæta á Austurvöll í dag og tjalda. Þeir sem eru sérlega tímabundnir eru engu að síður hvattir til að mæta með tjöld sín og heita mótmælendur því að vippa því upp fyrir þá. Hreyfingin telur mikilvægt að sjá sem flest tjöld á grasinu.

Hér má sjá facebook-síðu hreyfingarinnar.